Astronawt Sunita Uilýams açyk kosmosa çykmagyň umumy dowamlylygy boýunça zenanlaryň arasynda rekord eýesi boldy. Onuň stansiýanyň bortundan daşary işiniň umumy wagty 62 sagatdan geçdi. Bu barada ABŞ-nyň Aeronawtika we kosmos giňişligini öwrenmek boýunça milli edarasy (NASA) habar berdi.
30-njy ýanwardaky soňky çykyşyň dowamynda Uilýams Halkara kosmos stansiýasyndan daşynda tas alty sagat wagt sarp edip, umumy görkezijini 62 sagat 6 minuta ýetirdi. Şeýlelikde, ol Peggi Uitsonyň öňki rekordyny täzeledi. Indi Uilýams açyk kosmosda bolmagyň dowamlylygy boýunça ähli astronawtlaryň arasynda dördünji orny eýeleýär.
Uilýamsyň we onuň kärdeşi Barri Uilmoryň kosmosa çykmagy bejeriş işleri bilen baglanyşykly boldy. Bu amerikaly astronawtlaryň 2025-nji ýylda stansiýadan daşary ikinji gezek çykmagydyr – mundan öň, 16-njy ýanwarda, Uilýams bilen Nik Heýg enjamlaryň tehniki barlagyny geçirdi.
Ýatlap geçsek, ilkibaşda Uilýams bilen Uilmoryň missiýasy iki hepde dowam etmelidi, ýöne Boeing Starliner gämisiniň näsazlyklary sebäpli NASA olaryň Ýere gaýdyp gelmegini 2025-nji ýylyň ýazyna süýşürdi. Starliner gämisiniň özi 8-nji sentýabrda ekipažsyz yzyna gaýdyp geldi.
