Geçen ýyl Saud Arabystanynda mirasdüşer şazada Muhammed bin Salman adyndaky köp maksatly stadionyň taslamasy hödürlenildi. Täze stadion Er-Riýad şäheriniň golaýyndaky 200 metr beýiklikdäki Tuwaýk gaýasynyň depesinde ýerleşer. Stadionyň gurluşygy Saud Arabystanynyň dynç alyş we syýahatçylyk megataslamasy bolan Kiddiýanyň çäginde amala aşyrylar.
Bu stadion dünýäde ilkinji bolup doly birleşdirilen hereketli meýdançalar, öwrülýän üçekler we LED diwarlar bilen enjamlaşdyrylar. LED diwarlarda stadionyň içinde bolup geçýän ýokary hilli göni ýaýlymlar, täsirli wakalar we lazer şüweleňleri görkeziler. Diwaryň açylmadyk wagty, Kiddiýa şäheriniň ajaýyp görnüşi tomaşaçylara hödürlener.
Bu täsirli desganyň gurluşygy 2029-njy ýylda tamamlanar we stadion 46979 tomaşaça hyzmat eder. Şeýle hem, bu stadion 2034-nji ýylda geçiriljek FIFA Dünýä çempionatynyň meýdançalarynyň biri bolar. Bu çempionada Saud Arabystany eýeçilik eder we 2034-nji ýylyň 12-nji ýanwaryndan 19-njy fewralyna çenli dowam eder. Şeýle hem stadion Saud Arabystanynyň ýokary ligasy bolan Saud Premýer ligasynyň toparlary «Al-Hilýal» we «Al-Nasr» üçin öý meýdançasy hökmünde hyzmat eder.
Stadionyň gurluşyk işleri, 120 ýyldan gowrak tejribesi bilen dünýä belli ispan gurluşyk kompaniýasy FCC Construcción we Saud Arabystanynyň Nesma & Partners Contracting kompaniýasy tarapyndan alnyp barylýar.
