Audi kompaniýasy Q6 Sportback e-tron krossoweriniň binýadynda döredilen konseptual SUV Audi Q6 e-tron awtoulagyny hödürledi. Bu entek diňe Audi elektrik ulaglarynyň ýolsuz ýerlerde mümkinçiliklerini görkezýän prototip bolsa-da, onda käbir adaty bolmadyk bölekler bar.
Awtoulag bilelikde 517 at güýjüni öndürýän iki sany elektrik hereketlendirijisi bilen enjamlaşdyrylandyr. Emma awtoulagda esasy ünsi özüne çekýän zat – bu ýörite işlenip taýýarlanan portal okly podweska. Onuň kömegi bilen awtoulag 45 gradusa çenli kötelleri we ýapgytlary ýeňip geçmäge ukyply.
Ýolsuz ýerlerden geçişiniň hilini gowulandyrmak üçin ýerden beýikligi 160 mm artdyryldy, teker yzy 250 mm giňeldi. Şeýle-de, täze podweska tekerlere torky 50% ýokarlandyrýar. Emma awtoulagyň iň ýokary tizligi sagatda 175 km bilen çäklendirildi.
Audi-iň ýolbaşçysy Gernot Dýollneriň sözlerine görä, Q6 e-tron off-road konsepti elektrik ulagy platformasynyň mümkinçiligini görkezýär we tekerleri doly hereketlendiriji quattro ulgamyna täzeçe garaýyş hasaplanýar.
“Bu awtoulag täze sepgitleri eýeläp biler. Müşderilerimiziň bu emosional awtoulag baradaky seslenmelerine sabyrsyzlyk bilen garaşýarys" – diýip, ulagyň ilkinji synag sürülişinden soň Dýollner mälim etdi.
