Ilon Maskyň The Boring Company kompaniýasy Las-Wegasda tunelleriniň täze şahasyny açdy. Bu şaha Tesla awtoulaglaryna ýokarky ýolda ulag dykynlary we awtoulag duralgasynyň ýetmezçiligi sebäpli, 25 minut töweregi wagt alýan ýoly iki minutda geçmäge mümkinçilik berer diýip, KTNV belleýär.
Tuneller iki sany dar, aýry "turbalar" görnüşinde. Olar 12 metre çenli çuňlukdan geçirilip, häzirlikçe sürüjili dolandyrylýan Tesla Model 3 we Model Y awtoulaglary üçin niýetlenendir. Emma kompaniýa olary 2025-nji ýylyň ahyryna çenli awtonom režime geçirmegi meýilleşdirýär.
Täze şaha Westgate Resort mynmanhanasyny esasy tunel toruna birleşdirýär.
Täze stansiýa ulgamda altynjy stansiýa boldy. The Boring Company kompaniýasy olaryň birinjisini 2021-nji ýylda açypdy we eýýäm şol wagt taslamanyň bahasy 52 million dollardan geçdi.
Doly kuwwatynda işlände täze bölüm sagatda 4400 ýolagçyny gatnatmaga ukyplydyr. Emma tor entek doly güýjünde ulanylmaýar. Umuman alanyňda, tamamlanan ulgam şäheriň esasy ýerlerini, şol sanda howa menzilini we esasy söwda merkezlerini birleşdirýän 55 stansiýasy bolan 109 kilometri öz içine alar diýlip garaşylýar. Tutuş toplum sagatda 90 müňden gowrak ýolagçyny daşap biler.
Taslamada kynçylyk ýok däl: The Boring Company kompaniýasy zähmet düzgünlerini bozandygy üçin birnäçe gezek jerime tölemeli boldy. Şeýle hem bu kompaniýa howpsuzlyk bilen bagly meseleler sebäpli-de hökümetiň ünsüni özüne çekdi, sebäbi her ýyl tunele girmäge rugsat berilmedik pyýadalaryň, hatda awtoulaglaryň hem girmegi bilen bagly onlarça hadysa hasaba alynýar. Olaryň hemmesi tunele tötänden düşendiklerini tassyklaýarlar.
