Amerikaly aktýor Bred Pitt “Haýwan ýüregi” (Сердце зверя) başdangeçirmeler ekşn filminde baş keşbi janlandyrar we onuň prodýuseri bolup çykyş eder. Bu barada Deadline neşiri habar berdi.
Filmiň režissýory “Aryçy” (Пчеловод) we “Öz janyna kast edijileriň topary” (Отряд самоубийц) filmleri bilen tanalýan Dewid Eýer bolar. Lenta Paramount Pictures studiýasy tarapyndan Plan B Entertainment prodakşen kompaniýasy bilen bilelikde çykarylar.
Film awiaheläkçilikden soň Alýaskanyň ýowuz şertlerinde diri galmak üçin göreşýän ýörite maksatly harby toparyň öňki esgeri we onuň pensiýa çykan söweşjeň iti barada gürrüň berer.
Filmiň ssenariýasyny klipmeýker Kemeron Aleksandr ýazdy. Ol hem Demýen Şazell (La-la Lend) ýaly beýleki birnäçe prodýuser bilen bilelikde “Haýwan ýüregi” filminiň prodýuseri bolup çykyş eder.
Eýer we Pitt üçin bu ilkinji hyzmatdaşlyk däl. 2014-nji ýylda olar “Gazap” (Ярость) filmini çykardy. Ol Ikinji jahan urşunyň soňky günleri howply missiýany ýerine ýetirýän tank ekipažy barada gürrüň berýär.
