Germaniýaly alymlar kebelekleriň ganatlarynyň hereketlerinden ylham alyp, elektroniki gurluşlar bolmazdan işleýän magnit ganat tehnologiýasyny işläp düzdüler diýip, Tech Xplore neşiri habar berýär.
Darmştadt tehniki uniwersitetiniň we Gelmgolts Drezden-Rossendorf adyndaky Merkeziň inženerleri magnit meýdanlary arkaly işleýän robot ganatlary döretdiler. Kebelekleriň ganatlarynyň aýratynlyklaryna esaslanýan bu enjam, elektroniki gurluşlar ýa-da batareýalar bolmazdan takyk hereketleri ýerine ýetirmegi başarýar.
Alymlar bu tehnologiýa üçin şa kebelekleriň biologiýasyndan ylham aldylar. Robotyň ganatlary çeýe plastmassadan we magnit bölejiklerinden ýasalan. Daşky magnit meýdanlarynyň täsirinde ol ganatlar epilip, tebigy hereketleri ýüze çykarýar.
Inženerler 3D (üç ölçegli) çap ediji arkaly işlenip düzülen 12 sany dürli ganat gurluşyny synagdan geçirdiler. Şolaryň arasynda, şa kebelekleriniň ganatlaryna mahsus bolan tebigy damarlaryň gurluşyny täzeden döretmek taslamanyň esasy tapgyry boldy.
Bu tehnologiýa geljekde daşky gurşawyň gözegçiliginde, gözleg we halas ediş operasiýalarynda hem-de lukmançylykda giňden ulanylyp bilner.
