YouTube wideo platformasy mahabat bloklaýjylary (ad blocker) ulanýanlara birnäçe sagat dowam edýän we geçip bolmaýan mahabatlary görkezip başlady diýip, Android Authority habar berýär.
Google bu ýagdaýyň öz işi bilen baglanyşyklydygyny boýun aldy.
«Mahabat - döredijilerimiziň işini dolandyrmagyna we ösdürmegine kömek edýän möhüm girdeji çeşmesidir. Şol sebäpdenem, mahabat bloklaýjylary ulanmaklyk YouTube Hyzmat şertlerimiziň bozulmagyna sebäp bolup durýar. Mahabat blokirlaýjylary ulanýan tomaşaçylarymyzy mahabatlara rugsat bermäge ýa-da mahabatsyz görmek üçin YouTube Premium-y synap görmäge höweslendirmek üçin global kampaniýa başlatdyk» diýip, YouTube düşündiriş berdi.
YouTube, adatça, görmän geçip bolmaýan wideomahabatlaryň diňe 15 sekunt bilen çäklendirilýändigini düşündirdi. Şeýle-de kompaniýa mahabatlary bloklamaga synanyşýan ulanyjylary ýüze çykarmak hem-de olara bu programmalardan ýüz öwürtmek boýunça edýän tagallalaryny hem boýun aldy. Eger bu ýagdaý dowam etse, Google wideolary görkezmegi düýpli ýatyrmaga haklydygyny belledi.
Google bu ýagdaýy mahabat bloklaýjylary ulanýan ulanyjylara garşy soňky çynlakaý çäre hökmünde häsiýetlendirdi. Eger-de has çylşyrymly çözgütlere geçmek zerurlygy ýüze çyksa, Google şeýle ulanyjylaryň profillerini dolulygyna gadagan etmäge taýýardygyny nygtady.
