Ýaponiýanyň aerokosmos gözlegleri agentligi (JAXA) we NEC korporasiýasy hemralaryň arasynda lazer aragatnaşygynyň tizligi boýunça rekord goýdular, olar maglumatlary 1,8 Gbit/s tizlik bilen 40 000 km aralyga iberdi.
Bu netije adaty radio tolkunlarynyň mümkinçiliklerinden ep-esli ýokarydyr. Şeýle görkezijiler Ýeri uzak aralykdan barlamak üçin niýetlenen DAICHI-4 hemrasyny we geostasionar orbitadaky optiki hemra-retranslýatory ulanmak bilen, LUCAS (Laser Utilizing Communication System) taslamasynyň çäginde gazanyldy. Täze tejribede 1,5 mkm tolkun uzynlygy aralygynda lazer aragatnaşyk tehnologiýasy ulanyldy.
Taslama Ýere gözegçilik baradaky maglumatlary geostasionar hemra arkaly bir aragatnaşyk seansynda ýerüsti stansiýa ibermäge mümkinçilik berdi, bu hem Arktika we Afrika ýaly kyn sebitlerde maglumat almagy ep-esli tizleşdirýär. Radio aragatnaşygyndan tapawutlylykda, lazer şöhleleri ýokary geçirijilik ukybyny üpjün edýär we päsgelçiliklere az sezewar bolýar.
Bu üstünlik kosmos aragatnaşygyny ösdürmek üçin täze gözýetimleri açýar hem-de gämi gatnawlaryna gözegçilik we howpsuzlygy üpjün etmek ýaly global sosial meseleleri çözmäge ýardam eder.
JAXA we NEC kosmos ulgamlary üçin lazer tehnologiýasyny kämilleşdirmegi dowam etdirer.
