Italiýaly tennisçi Ýannik Sinner Awstraliýannyň Açyk çempionatynyň (Australian Open) ýeňijisi boldy. Ol finalda germaniýaly Aleksandr Zwerewi utdy. Melburnda geçirilen ýaryşyň aýgytly oýny 6:3, 7:6 (7:4), 6:3 hasabynda tamamlandy.
23 ýaşly Sinner Professional tennisçileriň assosiasiýasynyň (ATP) reýtinginde birinji orny eýeleýär. Türgeniň hasabynda indi guramanyň howandarlygynda geçirilen ýaryşlarda 19 ýeňiş bar. 2024-nji ýylda tennisçi Awstraliýanyň Açyk çempionatynda we ABŞ-nyň Açyk çempionatynda ýeňiji boldy. 2023-nji we 2024-nji ýyllarda Sinner Italiýanyň milli ýygyndysynyň düzüminde Dewisiň Kubogynyň eýesi boldy.
Zwerew 27 ýaşynda bolup, dünýä reýtinginde ikinji orny eýeleýär. Onuň hasabynda ATP-niň howandarlygyndaky ýaryşlarda 23 ýeňiş bar. Onuň üçin bu “Uly tuwulga” ýaryşlarynda üçünji final boldy. Öň, ol ABŞ-nyň Açyk çempionatynyň (2020) we Fransiýanyň Açyk çempionatynyň (2024) finallaryna çykdy. Zwerew Tokioda geçirilen Olimpiýa oýunlarynyň çempionydyr.
Awstraliýanyň Açyk çempionaty möwsümde birinji “Uly tuwulga” ýaryşy bolup, hard kortunda geçirilýär. Ýaryşyň baýrak gaznasy 59,7 mln dollardan geçýär.
