Huawei kompaniýasy Hytaýyň Täze ýyl baýramçylygy mynasybetli Pura 70 Ultra smartfonynyň ýörite wersiýalaryny çykardy.
Täze önümler Red Edition (“Gyzyl wersiýa”) we Black Edition (“Gara wersiýa”) diýlip atlandyryldy. Esasy tapawutly tarapy - özboluşly dizaýny.
Gyzyl modeliň arka paneli “gözenek çyzmyk” nagyşly deriden edilen we kameranyň moduly bolsa altyn öwüşginli ýalpyldawuk örtük bilen bezelen. Gara wersiýa ýalpyldysyz metal üst gatlagy bilen tapawutlanýar.
Gizmochina portalynyň maglumatlaryna görä, Täze ýyl nusgalaryny Huawei-iň resmi Weibo kanallary we VMall onlaýn dükany arkaly eýýäm sargyt edip bolýar. Ilkinji 30 alyjy bir jübüt FreeBuds 5i nauşnigini we Pura 70 üçin gelşikli daşlyk torbajygy alar.
Enjamlaryň tehniki häsiýetnamasy öňküligine galdy. Smartfonda 120Hz täzelenme tizlikli 6,8 dýuým OLED ekran, 5200mAh batareýa we 100W çalt zarýad beriş, 80W simsiz zarýad beriş we 20W rewersiw goldawy bar. Smartfon IP68 standartyna laýyklykda suwdan we tozandan goralýar, şeýle hem USB Type-C birleşdirijisi bilen enjamlaşdyrylandyr.
Smartfonyň kamerasy üç modul bilen görkezilýär: 50 MP esasy datçik, 40 MP ultra giň burçly obýektiw we 50 MP makro-teleobýektiw. Selfi üçin 13 megapikselli dürli hili surata alyş režimli ultra giň burçly sensory bar.
Smartfon hemra aragatnaşygyny, galtaşyksyz töleg funksiýalaryny we şekili gaýtadan işlemek üçin emeli aň esasly gurallary goldaýar.
Enjam satyn alnandan soň derrew HarmonyOS NEXT-iň indiki wersiýasyna çenli täzeleniş mümkinçilikli HarmonyOS 4.2 -de işleýär.
Pura 70 Ultra-nyň Täze ýyl wersiýalary gelşikli dizaýn bilen ýokary tehnologiýaly enjamlaryň sazlaşygyny hödürleýär.
