Kanadaly suratçy Stiwen Haýning bu täsin suratlary düşürmek üçin bir ýyldan gowrak taýýarlyk gördi we netijede ol dünýä rekordyny täzelemegi başardy. Model Siara Antowski we howpsuzlyk boýunça hünärmenler topary bilen bilelikde Haýning suwastynda iň çuň ýerde fotosessiýa geçirmek boýunça Ginnesiň rekordlar kitabyna üçünji gezek atlaryny ýazdyrdylar diýip, PetaPixel neşiri habar berýär.
Fotosessiýa 49,80 metr çuňlukda geçirildi. Bu 2023-nji ýylyň dekabr aýynda Kim Bruno we Pieý Oýarsunyň 39,92 metr çuňlukda goýan rekordyndan has ýokary netije boldy.
Haýningiň ozalky rekord goýan fotosessiýalary – 2023-nji ýylyň iýul aýynda 10 metre barabar we 2023-nji ýylyň noýabr aýynda bolsa 30 metre barabar çuňlukda geçirilipdi.
Haýningiň täze rekordy, öňki synanyşyklardan-da has aýdyň üstünlik bolup durýar. Sebäbi olar 39 metrden aşakdaky dekompressiýa zolagynda 10 minutdan gowrak saklanmaly boldular.
39 metrden geçýän çuňluklara çümmek üçin, dekompressiýa keseli (bedene köp mukdarda azodyň we beýleki gazlaryň siňmegi) ýaly howplardan goranmak boýunça goşmaça howpsuzlyk çäreleri zerur bolup durýar.
