Garyşyk başa-baş söweş sungaty boýunça täze GFL (Global Fight League) ligasy sosial ulgamlardaky sahypasynda ýeňil agramda UFC-niň wagtlaýyn titulynyň öňki eýesi Toni Fergýuson bilen şertnama baglaşandygyny habar berdi.
Fergýuson professional karýerasyna 2008-nji ýylda başlady we häzire çenli 36 söweşe gatnaşdy. Onuň hasabynda 25 ýeňiş we 11 ýeňliş bar.
Fergýuson soňky söweşini 2024-nji ýylyň awgust aýynda geçirdi. Bu söweşde birinji raundda demikdiriji usul bilen Maýkl Kýezeden ýeňildi. Bu ýeňliş onuň üçin soňky bäş ýylda yzygider sekizinji boldy. Umuman aýdanyňda, Toni 2019-njy ýyldan bäri ýeňiş gazanmady.
Belläp geçsek, GFL – täze amerikan ligasy bolup, ol UFC we PFL ligalaryndan tapawutlanar. Guramaçylaryň aýtmagyna görä, liga söweşijiler bilen girdejini 50/50 paýlaşmaga taýýar. Promouşeniň resmi ýüzi bolup öň PFL-de tejribesi bolan Darren Ouen çykyş eder. Habar berlişi ýaly, liganyň şertnama baglaşan söweşijileriniň sany eýýäm 300-e ýetýär.
