Toyota birnäçe ýyl mundan ozal, elektrikli awtoulaglarynda harp we san belgilerini ulanmagy ýola goýdy. Kompaniýa ulaglaryň adyny tertipli, düşnükli hem-de ýatda galyjy etmegi maksat edinipdi. Emma bu üýtgeşme Ýewropa bazaryndaky alyjylara ýaramady. Bu barada Toyota-nyň Ýewropadaky marketing bölüminiň müdiri Andrea Karluççi, “Autocar” neşiri bilen söhbetdeşliginde aýdyp geçdi.
Markanyň wekiliniň sözlerine görä, modelleriň atlandyrylyşynda harplaryň we sanlaryň ulanylmagy ulaglaryň ölçeglerini we derejelerini alyjylara düşündirmegi aňsatlaşdyrmak üçin edilipdi. Mysal üçin, “bZ4X” belgisi bir giden simwollaryň ýygyndysy ýaly bolup görünýär, emma aslynda onuň manysy bar: bZ – “Noldan öte” (beyond Zero, elektrik liniýasynyň umumy belgisi) diýmekdir, 4 – modeliň ölçegini derejelendirýär, X – bolsa krossower klasyna degişlidigini aňladýar.
Karluççiniň belleýşi ýaly, bu konsepsiýa Ýewropada halanmady: alyjylar açyk duýduryş berdiler, kompaniýanyň Ýaponiýadaky baş edarasy bolsa bulary diňledi. Şonuň üçin, bZ4X-den soňky käbir täze modeller şol bir stilde atlandyrylsa-da, Toyota soňky krossowerine has düşnükli at – ýagny Urban Cruiser adyny berdi.
