ABŞ-nyň Milli ýol hereketi howpsuzlygynyň administrasiýasy (NHTSA) Honda kompaniýasyna degişli awtoulaglar boýunça derňew işine başlady. Munuň sebäbi awtomatik tormoz ulgamy bilen baglanyşykly kemçilikleriň bardygy baradaky şikaýatlar bolup durýar. Şu sebäpden Honda 300 müňe barabar awtoulagy yzyna çagyryp biler diýip, Reuters habar berýär.
Şikaýatlara görä, awtomatik tormoz ulgamy kähalatlarda hiç hili esas ýok wagty birden işläp başlaýar. Garaşylmadyk saklanmalar awtoulagyň sürüjisine, ýolagçylara we beýleki awtoulaglaryň sürüjilerine ýol heläkçiligi üçin uly töwekgelçilik döredýär. Derňew 295 müň 125 awtoulagy öz içine alýar.
NHTSA-nyň berýän maglumatlaryna görä, bu näsazlyk 2019-2022-nji ýyllaryň «Honda Insight» gibrid modellerinde we uly «Passport» krossowerlarynda ýüze çykýar. Bulardan başga-da, 2023-nji ýyldaky «Passport» modelleri hem derňewiň çägine giriziler.
Ilki bilen tehniki seljerme geçirilip, soňra bolsa yzyna çagyrmak boýunça karar kabul ediler. Honda bu ýagdaýyň sebäbini, belki sürüjiler funksiýany nädogry ulanýandyr diýip düşündirjek bolýar. Emma NHTSA-da 106 sany şikaýat, şol sanda üç sany tassyklanan ýol heläkçiligi we iki sany şikeslenme hasaba alnan.
