Dünýäniň birinji raketkasy Ýannik Sinner we WTA-nyň reýtinginde ikinji orny eýeleýän Iga Swýontek Halkara tennis federasiýasy (ITF) tarapyndan ýekelikde 2024-nji ýylyň dünýä çempionlary diýlip ykrar edildi. Bu barada guramanyň metbugat gullugy habar berýär.
Sinner 2024-nji ýylda Italiýanyň milli ýygyndysyny Dewisiň Kubogynda ýeňşe getirdi, Australian Open, US Open ýaryşlarynda we ATP-niň Jemleýji ýaryşynda ýeňiji boldy. Ol ITF-niň ilkinji italiýaly dünýä çempionydyr.
Geçen möwsümde Swýontek “Rolan Garrosda”, WTA-1000 kategoriýasynyň dört ýaryşynda ýeňiş gazandy, Pariždäki Olimpiadada bürünç medal alyp, Polşanyň milli ýygyndysy bilen Billi Jin King Kubogynyň ýarym finalyna çykdy.
Jübüt görnüşde dünýä çempionlary hökmünde “Rolan Garrosyň” ýeňijileri salwadorly Marselo Arewalo we horwatiýaly Mate Pawiç ykrar edildi. Zenanlaryň arasynda dünýä çempionlary italiýalylar Sara Errani we Žasmin Paolini boldy. Olar Pariždäki Olimpiýa oýunlarynda ýeňiş gazandy.
ITF-niň dünýä çempionlary möwsümiň, şol sanda “Uly tuwulga” ýaryşlarynyň, milli ýygyndylaryň ýaryşlarynyň we Olimpiadalaryň netijelerini göz öňünde tutmak bilen kesgitlenýär.
