Amazon kompaniýasy ABŞ-da synaglar geçirilýän wagtynda birnäçe çaknyşyklardan soň, “Prime Air” atly drony bilen harytlary eltmek taslamasyny togtatdy. Kompaniýa bu taslama bilen 2030-njy ýyla çenli 500 million sargydy dronlar bilen eltmegi maksat edinýärdi. Emma geçen ýylyň dowamynda ýüze çykan hadysalar bu meýilnamanyň ýerine ýetilmegini kynlaşdyrdy diýip, PCMag ýazýar.
2024-nji ýylyň dekabr aýynda ABŞ-nyň Oregon ştatyndaky bir synag merkezinde ýaramaz howa şertleri sebäpli iki sany MK30 drony çaknyşdy. Ondan öň, sentýabrda operatoryň säwligi bilen başga bir çaknyşyk boldy. Şu wakalardan soň, kompaniýa taslamany täzeden gözden geçirdi we ähli dronlara programma üpjünçiliginiň möhüm täzelenmelerini girizdi.
Aprel aýynda Amazon Kaliforniýanyň Lokford şäherinde amala aşyrylmagy meýilleşdirilen bu taslama bilen bagly ähli işleri togtatdy. Sebäbi maliýe serişdelerini başga ugurlara gönükdirmek we has möhüm hasaplanýan maksatnamalara sarp etmek kararyna gelindi. Şol bir wagtda, birnäçe ýolbaşçy bu taslamadan çekildi.
Bu kynçylyklara garamazdan, maý aýynda Amazon dronlaryň uzak aralyga uçmagy üçin rugsat aldy. Kompaniýa täzelenen MK30 dronlary ýagyş, sowuk we yssy ýaly howa şertlerinde-de harytlary eltmek üçin amatly diýip hödürleýär. Oktýabr aýynda bu taslamanyň Beýik Britaniýada we Italiýada giňeldilmegi meýilleşdirildi.
