Barlagçylar Milanyň Sforsa galasynyň aşagynda Leonardo da Winçiniň çyzgylarynda beýan edilen gizlin ýerasty ötükleriň bardygyny tassykladylar diýip, Arkeonews ýazýar.
XV asyrda gurlan Sforsa galasy taryhçylar we binagärler tarapyndan köpden bäri öwrenilip gelinýän obýekt. Şeýle-de bolsa, Galkynyş zamanasynyň uçursyz zehinli adamy tarapyndan beýan edilen ýerasty geçelgeler uzak wagtlap syr bolmagynda galypdy.
Bu açyş Milanyň Politehniki uniwersitetiniň hünärmenleri tarapyndan meşhur galanyň işgärleriniň kömegi bilen hem-de Codevintec kompaniýasynyň georadarlar we lazer skaneri ýaly ösen tehnologiýasy bilen geçirilen innowasion barlaglaryň netijesidir. Tehnologiýa indi görünmeýän gadymy binagärlik elementlerini sanly görnüşde dikeltmäge kömek etdi.
Alymlaryň pikirine görä, gizlin ötelgeler harby maksatlar üçin ulanylypdyr. Şeýle-de bolsa, olaryň arasynda galany golaýynda ýerleşen buthana bilen baglanyşdyrýan biri bar. Rowaýata görä, ötelge köplenç aýaly Beatriçe d'Estäniň mazaryna zyýarat edýän gersog Lodowiko Sforsanyň şahsy ulanmagy üçin niýetlenipdir. Taryhçylaryň tassyklamagyna görä, ol söýgülisi ölenden soň, “dälirän ýaly hasrat çekipdir”. Munuň zenanyň ýadygärliginiň özboluşly bir kultynyň döremegine we belki-de, gersogyň tiz wagtda ruhy taýdan çökmegine getirendigini aýdýarlar.
Politehniki uniwersitetinden professor Franko Gussetti taslamanyň galanyň diňe bir häzirki ýagdaýyny öwrenmäge däl, eýsem ýitirilen binagärlik elementlerini dikeltmäge mümkinçilik berjek sanly modelini döretmegi maksat edinýändigini aýtdy.
Bu açyş giňeldilen hakykat tehnologiýalarynyň ornaşdyrylmagy netijesinde syýahatçylyk üçin täze mümkinçilikler açar. Gyzyklanýanlara ýerasty giňişliklere wirtual gezelençler hödürlenýär.
