Özbegistanyň futbol boýunça milli ýygyndysy Merkezi Aziýanyň Futbol Assosiasiýasynyň Milletler Kubogynda (CAFA Nations Cup 2025) final oýunda Eýrany ýeňdi. Duşuşyk 8-nji sentýabrda Daşkentdäki täze «Olimpik» stadionynda geçirildi we ýer eýeleriniň peýdasyna 1:0 hasabynda tamamlandy.
Eýranly futbolçylar duşuşygyň ilkinji minutlarynda azlykda galdy – 5-nji minutda goragçy Ariýa Ýusefi Abbosbek Faýzullaýewiň aýagyna basdy we VAR arkaly seredilenden soň göni gyzyl kartoçka aldy. Şeýle-de bolsa, özbek futbolçylary esasy wagtda san taýdan artykmaçlygyny peýdalanyp bilmediler. 90 minutdan soň hasap 0:0 boldy.
108-nji minutda Özbegistanyň topary 11 metrlik jerime urgusyny gazandy, emma milli ýygyndynyň kapitany Eldor Şomuradow topy derwezä girizip bilmedi.
Netije diňe 120-nji minutda çözüldi – Özbegistanyň goragçysy Hojaakbar Aližonow kelle urgusy bilen öz toparyna ýeňiş gazandyrdy.
2023-nji ýylda ilkinji gezek geçirilen CAFA Nations Cup ýaryşynyň finalynda Özbegistan Eýrandan 0:1 hasabynda ýeňlipdi. Bu gezek özbek futbolçylary rewanş almagy başardylar.
Altyn medallary we kubogy ýeňijilere FIFA-nyň prezidenti Janni Infantino hem-de Özbegistanyň Prezidenti Şawkat Mirziýoýew gowşurdy.
