Donald Tramp TRUMP atly öz kriptowalýutasyny çykarandygyny mälim etdi. Syýasatçy bu baradaky habary özüniň Truth Social sosial torunda paýlaşdy.
TRUMP tokeni çaklanylyşy ýaly ünsi tiz özüne çekdi. Tanyşdyrylanyndan bary-ýogy birnäçe sagatdan soň, kriptowalýutanyň bahasy 11 647% ýokarlandy diýip, Economic Times ýazýar.
Taslamanyň kapitallaşdyrylyşy 3 sagatdan gysga wagtda 8 milliard dollara, iň ýokary derejesinde bolsa 13 milliard dollara baryp ýetdi.
Habar çap edilenden soň, Trampyň hasabynyň hakykylygyna şübheler ýüze çykdy, emma ol haker hüjüminiň bolmandygyny aýtdy. Şeýle-de kriptowalýutany işe girizmek, Trampyň sanly aktiwleriň senagatyna we bitkoine ünsi jemlemek baradaky saýlaw kampaniýasynyň wadalaryna laýyk gelýär.
Kriptowalýutanyň umumy mukdary 1 milliard bolsa-da, 200 million token bazara çykaryldy. Olaryň 80%-i The Trump Organization bilen baglanyşykly CIC Digital LLC we diňe birnäçe gün öň hasaba alnan Fight Fight Fight LLC kompaniýalaryna degişlidir.
Habaryň ýazylan wagty bir tokeniň bahasy 24 dollara deňdir.
