ABŞ-nyň Massaçusets ştatynyň 55 ýaşly ýaşaýjysy Brent Hill Apple Watch akylly sagadynyň heläkçiligi anyklamak funksiýasynyň kömegi bilen ölümden halas boldy. Ol rulda wagty huşuny ýitirip, ulagyny goňşusynyň howzuna tarap sürdi diýip, 9to5Mac neşiri habar berýär.
Waka geçen ýylyň 16-njy dekabrynda bolup geçdi. Hill birden özüni erbet duýandygyny we huşuny ýitirendigini aýtdy. Wideoda ulagyň ýokary tizlik bilen garažy döwüp, howza agdarylandygy görünýär. Hill özüne gelende, bir ses eşidendigini aýtdy. Ol muňa ilki gulagyna eşidilýändir öýdüpdir. Emma aslynda ol, Apple Watch akylly sagady arkaly çagyrylan tiz kömek gullugynyň sesi bolup çykypdyr.
“Men howsala düşdüm. Näme bolanyna düşünmän galdym. Maşynymyň köçede şeýle çalt tizlik bilen hereket edenini görenimde, haýran galyp seretdim” diýip, Hill gürrüň berýär.
Onuň bellemegine görä, sagat arkaly wagtynda tiz kömek gullugynyň operatorlary bilen habarlaşyp bilmedik bolsa, ol suwuň astynda ters duran ulagyndan çykmagy başarmazdy.
Bu waka häzirki zaman enjamlarynda howpsuzlyk funksiýalarynyň näderejede zerurdygyny görkezýär. Heläkçiligi anyklamak funksiýasy watchOS 9 ulgamynda işleýän Apple Watch Series 8 we ondan soňky modellerde, Apple Watch Ultra, Apple Watch SE 2 hem-de olardan soňky modellerde, şeýle hem iOS 16 we ondan soňky wersiýalarda işleýän iPhone 14 we ondan soňky modellerde elýeterlidir.
Ýatlatsak, akylly sagat mundan öň hem, açyk deňziň akymyna düşüp giden sýorferi halas edipdi.
