Şweýsariýanyň Micro Mobility Systems AG kompaniýasy özüniň Microlino atly elektrikli awtoulagynyň täze görnüşini tanyşdyrdy. Täze model “Spider” (Möý) diýlip atlandyrylyp, onuň üçegi we öň tarapdaky gapysy ýok diýip, New Atlas neşiri habar berýär.
Kompaniýa kapsula görnüşindäki elektrikli mikromobil konseptini ilkinji gezek 2016-njy ýylda görkezipdi. Üç dürli görnüşde öndürilýän bu awtoulaglaryň köpçülikleýin önümçiligine ýakyn wagtda başlandy. “Spider” modeli olaryň dördünjisi boldy.
Microlino awtoulaglarynyň retro stilindäki öňki modellerinde öň tarapdaky gapylary bardy. Emma ulagy ABŞ bazaryna çykmak üçin kompaniýa bu aýratynlykdan ýüz öwürdi.
Eger-de “Spider” modeliniň köpçülikleýin önümçiligine başlansa, ol ABŞ-nyň ýaşaýyş zolaklarynda we myhmanhanalarynda, şeýle-de Ýewropanyň golf klublarynda ulanylýan golf awtoulaglarynyň has howpsuz görnüşi hökmünde hödürlener. ABŞ golf awtoulaglary üçin iň uly bazar bolup, bu ulaglar esasan ýakyn töwerege gidip-gelmek üçin ulanylýar.
Microlino Ýewropada elektrikli kwadrosikl hökmünde klassifikasiýalaşdyrylýar. ABŞ-da bolsa, NEV (Neighborhood Electric Vehicle) ýa-da LSV (Low-Speed Vehicle) görnüşindäki ulag kategoriýalaryna degişli ediler. Bu ulaglar diňe tizligi 56 km/s-den ýokary bolmadyk ýollarda sürlüp bilner. Kompaniýanyň berýän maglumatyna görä, ABŞ-daky ýollaryň ýarysy şu talaplara laýyk gelýär.
Kompaniýa “Spider” modeli barada jikme-jik tehniki häsiýetnamalary heniz aýan etmedi. Ýöne onuň häzirki Microlino modellerine meňzeş boljakdygy barada aýdylýar. Häzirki modeller 12,4 kWt kuwwatly hereketlendiriji we 15 kWt⋅s çenli batareýa bilen üpjün edilýär. Şeýle-de täze model ABŞ kanunlaryna laýyk getirilendigini bellemek bolar.
Üçegi bolmadyk ulagda özüni oňaýsyz duýjaklar üçin brezentden ýasalan tenti satyn almak mümkin bolar. Emma gapdal taraplary hemişe açyk bolar, bu bolsa münmegi we düşmegi ýeňilleşdirer. Ulagyň ruly we basgançak bölekleri agaçdan, salonyň beýleki bölekleri bolsa gök-ak reňklerdäki materiallardan ýasalar.
Awtoulagyň korpusy ýagtylyga görä, gökden ýaşyla we benewşe reňke öwrülýän boýag bilen boýalar.
