Microsoft kompaniýasy “CoreAI” atly täze inženerçilik bölüminiň döredilýändigini mälim etdi. Bu bölümiň ýolbaşçysy Jeý Parih bolar. Bölüm emeli aň (AI) gurallaryny we programmalaryny ösdürmäge gönükdiriler diýip, The Verge neşiri habar berýär.
Microsoft-yň baş müdiri Satýa Nadella 2025-nji ýylyň emeli aň ulgamynda öwrülişikli ýyl boljakdygyny belläp geçdi. Onuň pikirine görä, adatça onlarça ýyllap dowam edýän üýtgeşmeler geljek üç ýylyň dowamynda amala aşar.
CoreAI bölümi häzirki zaman AI programmalaryny işläp düzmek üçin niýetlenen “AI-first app stack” infrastrukturasyny döretmäge gönükdiriler. Bu infrastruktura Azure platformasyna esaslanar we esasy gurallar hökmünde Azure AI Foundry, GitHub we VS Code ulanylar. Täze işlenip düzülen AI ulgamlary SaaS bazarynda uly özgertmelere sebäp bolup biler.
Aslynda, häzirki wagtda Microsoft ähli programmistlerini dolulygyna emeli aň ugruna gönükdirýär.
Täze bölümiň ýolbaşçysy Jeý Parih, mundan ozal hem Meta kompaniýasynda ýokary wezipelerde işläpdi. Häzirki wagtda ol gönümel Satýa Nadellanyň garamagynda işleýär. Parih bilen bilelikde başga-da birnäçe ýolbaşçy iş alyp barar, olar: Erik Boýd (AI platformasynyň ýolbaşçysy), Jeýson Teýlor (AI infrastrukturasy boýunça tehniki müdiriň orunbasary), Juliýa Lýuson (Dev Div ýolbaşçysy) we Tim Bozart (programmistleriň infrastrukturasyna jogapkär).
