Iň uly tennis ýaryşlarynyň biri bolan Australian Open-i gurnaýjylar oýunlary ýaýlyma bermekde çäklendirmeleri ýeňip geçmek üçin özboluşly çözgüt tapdy. Olar hakyky oýunçylary Wii Sports oýnunyň äheňinde ýerine ýetirilen äpet kelleli sanly awatarlar bilen çalyşdy diýip, TechSpot habar berýär.
Tennis habarçysy Bastýen Fahan türgenleriň hereketini gaýtalaýan animasiýany döretmek üçin hereketi yzarlamak tehnologiýasynyň ulanylandygyny düşündirdi. Şeýle çemeleşme guramaçylara awtorlyk hukuklaryny bozmazdan oýny giň köpçülige görkezmäge mümkinçilik berdi.
Şuňa meňzeş tehnologiýalar sport ýaýlymlarynda eýýäm ulanyldy. Mysal üçin, geçen ýyl NHL ligasy Looney Tunes multfilmlerinden personažlaryň, mysal üçin, Bagz Banniniň we Gufiniň gatnaşmagynda oýunlaryň sanly wersiýasyny döretdi. Tomaşaçylar şeýle tejribelere, esasan, oňyn garaýar. Käbirleri hatda oýunlaryň sanly wersiýalarynyň has gyzyklydygyny belleýär.
Australian Open-iň hem bu başlangyjy döwrebap tehnologiýalaryň sport ýaýlymlarynyň adaty görnüşini üýtgedip, dünýädäki tomaşaçylar üçin täze mümkinçilikleri açyp biljekdigini görkezýär.
