Türkmenistanyň bilim ministri J.Gurbangeldiýewiň ýolbaşçylygynda ýurdumyzyň ýokary okuw mekdepleriniň rektorlaryndan ybarat wekiliýet paýtagtymyzyň ýokary okuw mekdeplerine aýlanyp gördi.
Türkmenistanyň Oguz han adyndaky Inžener-tehnologiýalar uniwersitetiniň wekilleri bilen duşuşykda uniwersitetiň rektory G.Mezilow bilim, ylym we önümçilik ulgamlarynda özara gatnaşyklary ýola goýmak babatda ýokary okuw mekdepde alnyp barylýan işler barada giňişleýin gürrüň berdi.
Soňra ýokary okuw mekdebiň myhmanlary barlag işleri hem-de uniwersitetiň düzüminde ýerleşýän Umumy we amaly biologiýa institutynyň barlaghanalarynda we «Oguzhan» ylmy-tehnologik merkeziň ylmy-önümçilik bölümlerinde ylmy taslamalaryň taýýarlanylyşy bilen jikme-jik tanyşdylar.
Wekiliýetiň agzalary «Goşmaça we üznüksiz bilim» atly okuw merkezde okuw işlerini, «Kibersport» merkezinde sport türgenleşikleriniň hem-de ýokary okuw mekdebiň intellektual klubundaky işleriň barşyny aýratyn gyzyklanma bilen synladylar.
Wekiliýet şeýle hem Türkmenistanyň Telekommunikasiýalar we informatika institutyna baryp gördi. Bu ýerde hormatly myhmanlar üçin «Bilim, ylym we senagat» atly sergi guralyp, onda ýokary okuw mekdebiň Ýaş alymlar geňeşiniň agzalary tarapyndan döredilen onlarça ylmy taslamalar görkezildi.
Institutyň ýaş mugallymlarynyň we talyplarynyň sergi işlerine programma üpjünçiligi, elektronika, robot tehnikasy ulgamlaryndaky taslamalar girip, olarda awtorlaryň täze pikirleri hem-de döwrebap çözgütleri, özboluşly döredijilik we ylmy çemeleşmeleri beýan edildi.
