Lenovo kompaniýasy Las-Wegasda geçirilen CES 2025 sergisinde aýdylan zatlary islendik dile şol wagt terjime edip bilýän we ulanyjylaryň saglyk ýagdaýyny seljerýän emeli aň (AI) bilen enjamlaşdyrylan täze nauşnigini tanyşdyrdy diýip, TechRadar habar berýär.
Enjamda dürli dillerde gürleýän adamlar bilen aragatnaşygy saklamak üçin niýetlenen birnäçe täsin aýratynlyklar bar. Esasy aýratynlyklaryň ýene biri-de sesleri klonlamak (gaýtalamak) funksiýasydyr. Emeli aň aýdylan sözleri terjime etmek bilen eýesiniň sesini takyk gaýtalap bilýär.
Şeýle-de, gulaklyk Lenovo Virtual Care ulgamyny goldaýar. Bu ulgam biometriki gözegçiligiň we emeli aňyň kömegi bilen ulanyjynyň saglyk ýagdaýyny seljerip bilýär. Mundan başga-da, nauşnik birnäçe işi awtomatlaşdyrylmaga kömek edýän Lenovo Action Assistant bilen işleýär.
Onda jemi 7 sany düwme we port bar. Olaryň arasynda sesiň derejesini sazlamak, multimediýany dolandyrmak üçin köp funksiýaly düwme we sesli kömekçini işjeňleşdirmek üçin aýratyn düwmeler bar. Enjama tiz zarýad bermek üçin USB-C porty göz öňünde tutulupdyr. Mikrofon taýajygy eplenýär, has gowy ses ýazgy etmek üçin aýlanyp bilýär.
