Eger Ýaponiýada demografik ýagdaý üýtgemese, häzirki depgin bilen 2720-nji ýylyň başyna çenli ýurtda 14 ýaşdan kiçi bir çaga galar. Bu Tohoku uniwersitetiniň professory Hirosi Ýosidanyň soňky hasaplamalaryndan gelip çykýar diýip, The Japan Times neşiri ýazýar.
Mundan öň şeýle ýagdaý 2821-nji ýylda bolar diýlip çaklanylypdy.
Täze maglumatlar çagalaryň sanynyň azalmak prosesini bellige alýan onlaýn sagatlar arkaly alyndy. Sagatlar Ýaponiýanyň ilatynyň düzüminde ýaş nesilleriň paýynyň okgunly depginde azalmagyny wizuallaşdyrýar.
Seljerme 2024-nji ýylda çaga dogluşy baradaky statistik maglumatlara esaslanýar. Geçen ýyl täze doglan çagalaryň sany ilkinji gezek 700 müňden az boldy. Bu hem ýaramaz çaklamanyň duýdansyz çaltlaşandygyny görkezdi. Häkimiýetler bu çäge diňe 2038-nji ýyla çenli ýetiler diýip garaşypdy.
Demografik çökgünlik ýapon jemgyýetiniň ähli taraplaryna täsir edýär. Häzir ilatyň bary-ýogy 11%-i 15 ýaşdan kiçi çagalar bolup, 65 ýaşdan uly adamlaryň paýy 30%-e ýetýär.
“Demografik syýasatda düýpli üýtgeşme bolmasa, ýagdaý ýaramazlaşmagyny dowam etdirer” – diýip, ylmy gözlegçiler belleýär.
Hünärmenler çaga dogluşyny durnuklaşdyrmak üçin toplumlaýyn çäreleriň zerurdygyny belläp geçýär. Mesele ykdysady, sosial we medeni ugurlary öz içine alýar, onuň çözgüdi bolsa uzak möhletleýin tagallalary talap edýär.
