Namibiýanyň çägindäki Zambezi derýasynda suwuň derejesi howsalaly görkezijä ýetdi. Derýanyň guramagy ýerli infrastruktura we ykdysadyýet üçin uly howp döredýär diýip, The Namibian habar berýär.
Afrikanyň iň uly derýalarynyň birinde suwuň azalmagy sebitde dowam edýän gurakçylygyň netijesi boldy. Derýada suwuň derejesi 15 sm çenli peseldi, bu soňky bäş ýylda iň pes derejedir. Bir ýyl ozal bu görkeziji 90 sm, 2019-njy ýylda bolsa 1,25 m barabardy.
Suwuň derejesiniň peselmegi bilermenleriň we ýerli häkimiýetiň arasynda alada döredýär. Milli suw üpjünçilik kompaniýasy Namibia Water Corporation-yň (NamWater) wekili Nalisa Mapenzi derýanyň mundan beýläkki saýlaşmagynyň infrastrukturanyň weýran bolmagyna we ykdysady ýitgä getirip biljekdigini belledi. Kompaniýa öýleri, ofisleri we kärhanalary arassa agyz suwy bilen üpjün edýär we energetika pudagyna-da möhüm täsiri bar.
Derýanyň saýlaşmagynyň sebäbi bolan guraklyk oba hojalygyna we Zambeziniň akyp geçýän ýurtlarynda gidroenergetika ýaramaz täsir etdi. Derýanyň uly Kariba we Kabora-Bassa gidroelektrostansiýalarynyň ýerleşýän aşaky akymlarynda suwuň derejesi iň pes derejä düşdi. Bu bolsa Zambiýa, Zimbabwe we Mozambik üçin elektrik energiýasynyň önümçiligini kynlaşdyrýar.
BMG-niň maglumatlaryna görä, Günorta Afrika ýurtlary soňky ýüz ýylda iň güýçli guraklygy başdan geçirýär. Bu guraklyk bolsa El-Ninýo klimat hadysasy bilen baglanyşyklydyr. Namibiýanyň we sebitdäki beýleki ýurtlaryň häkimiýetleri ýagdaýyň ýaramazlaşmagyna jogap hökmünde netijeleri gowşatmak üçin adatdan daşary çäreleri gördüler.
