"WeWalk" britan startap kompaniýasy görüşi pes adamlar üçin niýetlenen “Smart Cane 2” atly akylly, eplenýän hasasyny tanyşdyrdy. Enjam GPT emeli aň modeli esasynda işleýän ses kömekçisi bilen üpjün edilendir. “Emeli aňyň örän peýdaly we üstünlikli ulanylyşynyň az sanly mysallarynyň biri” diýip, Engadget belläp geçýär.
Hasanyň agramy adaty hasadan kän bir tapawutlanmaýar. Ol ses çykaryjy gurluş, mikrofon, päsgelçilikleri ýüze çykarýan ulgam we hereket duýujy enjamlar bilen üpjün edilendir.
Oýlap tapyjylar hemme zady göz öňüne tutupdyrlar: enjamda garaňkyda eýesini has göze ilginç edýän çyra hem ýerleşdirilendir.
Hasa Bluetooth gulaklyklaryna baglanyp bilýär. Ol smartfon bilen baglanyşdyrylandan soň, ulanyjy üçin ýol görkezip bilýär, ugruny kesgitleýär we ýanyndan geçip barýan dükanlaryň ýa-da beýleki ýerleriň ady bilen tanyş edip bilýär. Hasanyň batareýasynyň işleýiş wagty takmynan 20 sagatdyr.
Hasanyň ilkinji alyjylaryna enjamyň ýanwar aýynyň ahyryna çenli gowşurylmagy göz öňünde tutulýar. Bahasy 850-1150 dollar aralygynda üýtgeýär. Arzan görnüşini satyn alan ulanyjylar ses kömekçisinden peýdalanmak üçin aýda 5 dollar tölemeli bolýarlar, emma gymmat görnüşini satyn alanlara ähli funksiýalar goşmaça tölegsiz hödürlenýär.
Mundan öň Waşingtonda ýerleşýän Glidance kompaniýasy hem şuňa meňzeş taslamasyny tanyşdyrdy. Onuň Glide atly akylly hasasy ulanyjynyň howpsuzlygyny üpjün edýän stereoskopik kameralar bilen enjamlaşdyrylandyr. Taýak diňe bir çaknyşyklaryň öňüni almak bilen çäklenmän, gapylary, liftleri, merduwanlary we bordýurlary öňünden duýdurýar, şeýle-de çatryklarda hereketi togtadýar. Emma bu enjam 1500 dollardan hödürlenýär.
