30-njy dekabrda Keniýanyň paýtagty Naýrobiniň 120 km günorta-gündogarynda ýerleşýän Mukuku obasyna asmandan diametri, takmynan, 2,5 metr we agramy ýarym tonna barabar bolan demir halka gaçdy. Bu barada Keniýanyň kosmos gullugyna salgylanýan The New York Times neşiri habar berdi.
Deslapky maglumatlara görä, bu raketa göterijiniň bölüji halkasy.
"Şeýle obýektler, adatça, Ýeriň atmosferasyna girende ýanmaly ýa-da ummanlar ýaly, boş ýerlere düşmeli" – diýip, kosmos gullugynda habar berdiler. Bu gaçyş "seýrek ýagdaý" hökmünde häsiýetlendirildi we agentlik tarapyndan halkara kosmos kanunlaryna laýyklykda derňeler.
Sygyr bakyp ýören şaýatlaryň biri gaty gümpüldiniň eşidilendigini, soňra bolsa gyzyl öwüsýän ullakan tegelek obýektiň “haýallyk bilen asmandan gaçandygyny” we ýere düşenden soň bolsa sowap, çal reňke geçendigini gürrüň berdi.
Ýerli ýaşaýjylara zeper ýetmedi. Keniýanyň kosmos gullugy obýektiň howp salmaýandygyny we derňeljekdigini aýtdy.
Ýewropa kosmos agentligini[ hasaplamalaryna görä, Ýeriň pes orbitasynda 14 müň tonnadan gowrak material bar, olaryň üçden bir bölegi kosmos galyndylarydyr. Alymlar galyndylaryň mukdarynyň täze uçuşlar sebäpli artdyrjakdygyny bellediler, sebäbi galyndylary azaltmak boýunça geçirilýän çäreler uçuryşyň tizliginiň yzyndan ýetip bilmeýär.
Şuňa meňzeş wakalar öň ABŞ-da we Kanadada hem bolupdy. Şol ýerde raketalaryň has kiçiräk galyndylary binalara zeper ýetirip, fermalara düşüpdi.
