Tesla kompaniýasy öz bestselleriniň ornuny tutjak täzelenen Model Y 2025-i hödürledi. Bu krossoweriň 2020-nji ýylda satuwa goýberilenden bäri ilkinji täzelenmesidir.
Täze wersiýa mart aýyndan başlap Hytaýda we Aziýa-Ýuwaş ummany sebitiniň beýleki ýurtlarynda elýeterli bolar, Ýewropada we ABŞ-da bolsa birneme giç çykmagyna garaşylýar.
Elektrik krossoweri has ýiti çyzyklary we güberçek faralaryň deregine çyra zolagy oturdylan täze öň bölegi bilen Model 3-i ýada salýar. Yzky bölek hem üýtgedi: indi adaty çyralaryň deregine kese çyra zolagy ulanylýar.
Interýerde yzdaky ýolagçylar üçin täze sensor paneli, şeýle-de Model 3-den alnan atmosfera ýagtylyk zolagy peýda boldy. Mundan başga-da, asgyç (podweska) we galmagal izolýasiýasy kämilleşdirildi, bu hem ýol galmagalynyň derejesini peseltmäge mümkinçilik berdi. Iň ýokary wersiýanyň kuwwaty 450 at güýjüne, geçýän menzili 719 kilometre ýetýär.
Elektromobiliň esasy wersiýasy 5,9 sekuntda tizligini 100 km/sag çenli artdyrýar, doly herekete getirijili wersiýa bolsa munuň üçin 4,3 sekunt sarp edýär.
Esasy yzky herekete getirijili Tesla Model Y RWD-niň bahasy 263 500 ýuan (36 müň dollar). Doly herekete getirijili Long Range AWD-niň bahasy 303 500 ýuan (41 müň dollar). Iň kuwwatly wersiýa Performance birneme soň täzelenme alar.
Tesla 2024-nji ýyly 2023-nji ýyl bilen deňeşdirilende awtomobil üpjünçiliginiň pese gaçmagy bilen tamamlady. Bu kompaniýanyň awtomobilleri 2012-nji ýylda köpçülikleýin bazar üçin satyp başlandan bäri ilkinji pese gaçyş boldy.
