Las-Wegasda geçirilýän CES 2025 sergisinde Doublepoint Technologies startapy Apple Watch-e yşaratlar bilen dolandyrmaga mümkinçilik berýän WowMouse programmasyny hödürledi. Bu barada PR Newswire neşiri habar berdi.
Programma el hereketlerini tanamak üçin sagadyň içindäki datçiklerini ulanýar. Mysal üçin, barmaklary gysmak bir gezek basmagyň ýerini, eli galdyrmak bolsa sahypalary agdarmagyň ýerini tutýar. Birikmeklik Bluetooth arkaly amala aşyrylýar, Doublepoint-iň algoritmleri buýruklara derrew jogap bermegi üpjün edýär.
Ondan öň WowMouse diňe Samsung Galaxy Watch ýaly Android enjamlarynda bardy. Bir ýylyň dowamynda programma, takmynan, 100 müň gezek ýüklenip alyndy. Tehnologiýa häzirki wagtda dünýädäki akylly sagatlar bazarynyň ýarysyny diýen ýaly tutýan Apple Watch üçin elýeterlidir.
Programma mugt we kody döredijiler üçin açyk bolar. Şeýle hem, Doublepoint WowMouse-i telewizor, planşet we akylly öýler üçin uýgunlaşdyrmagy meýilleşdirýär. Häzir kompaniýa dolandyrmagy has takyk etmek üçin algoritmleri gowulandyrmagyň üstünde işjeň işleýär. Işläp düzüjileriň sözlerine görä, algoritmiň häzirki wersiýasy statiki şertlerde 97% takyklyga ýetýär, şeýle hem hereket edilýärkä-de wezipelerini gowy ýerine ýetirýär.
CES 2025-e gelenlere täze önümi synap görmek we artykmaçlyklaryna baha bermek mümkinçiligi berildi.
