Britaniýanyň Foster + Partners binagärlik edarasy Dubaýda (BAE) gökdirän ekiz binalaryň taslamasyny hödürledi. Täze Regent Residences Dubai toplumynyň esasy aýratynlyklaryndan biri - Sankari Place 180 metrlik iki diňiň arasyndaky geçelge bolar, şol ýerde howuz ýerleşer diýip, “Wokrug sweta” neşiri ýazýar.
Bu toplum Hor-Dubaý deňiz şahasynyň kenarynda ýerleşýän Business Bay işewürlik etrabynda gurlar. Taslama Sankari Properties we IHG Hotels & Resorts telekeçilik edaralary bilen hyzmatdaşlykda durmuşa geçirilýär.
Iki minarada hem howuzly giň eýwanlar bolar, olaryň görnüşi “aşak inýän suwuň” täsirini döretmeli. Binanyň aşaky gatlarynda dükanlar, sport zaly, gülçülik we garbanyşhana zolaklary bolar, ýokarky gatlarynda bolsa Burj Halifa bakýan giň öýler (her gatda biri) ýerleşer.
Iň ýokarky derejäni penthaus eýelär, onuň eýeleri we myhmanlary 180 metr töweregi belentlikdäki howuzdan peýdalanyp biler.
Gurluşygyň tamamlanjak senesi we toplumdaky ýaşaýyş jaýynyň bahasy entek yglan edilmedi. Şeýle-de bolsa, abraýly dizaýnyny we ýerleşişini göz öňünde tutsaň, megerem, bahalar emirlikdäki kaşaň gozgalmaýan emläklere laýyk bolsa gerek.
