Awiasion seljeriş kompaniýasy Cirium 2024-nji ýylda dünýäniň işini öz wagtynda ýerine ýetiren awiakompaniýalarynyň we howa menzilleriniň ýyllyk reýtingini hödürledi. Öňdebaryjylar Meksikanyň Aeromexico awiagatnadyjysy we Er-Riýadyň howa menzili boldy diýip, CNN habar berýär.
Reýting boýunça tertipden gyşarma 15 minutdan köp bolmaly däldi.
Aeromexico 86,7% takyklyk görkezijisi bilen dünýä awiakompaniýalarynyň arasynda öňdebaryjy boldy. Ikinji orunda Saudi Arabian Airlines (86,35%), üçünji orunda ABŞ-dan Delta Air Lines (83,46%) ýerleşdi.
Ýewropa awiakompaniýalarynyň arasynda iň gowulary Iberia Express (84,69%), Iberia (81,58%) we SAS (81,40%) boldy. Şeýle-de, ilkinji bäşlige Ispaniýanyň Vueling (81,20%) we Norwegiýanyň Norwegian Air Shuttle (79,23%) awiakompaniýalary girdi.
Howa menzilleriniň kategoriýasynda iň takygy Er-Riýaddaky patyşa Halid adyndaky Halkara howa menzili boldy. Ikinji we üçünji orunlary Limanyň (Peru) we Mehikonyň (Meksika) howa menzilleri eýeledi.
Cirium-yň gözlegi hakyky wagt maglumatlaryny ulanyp, gatnawlaryň takyk ýerine ýetirilişine baha berýär we pudakda iň abraýlylaryň biri hasaplanýar.
