Dünýäde iň uly awtoöndürijileriň üçlügine girýän Günorta Koreýanyň Hyundai we Kia kompaniýalary 2025-nji ýylda satuwy 2%, 7,39 mln awtomobile çenli artdyrmak meýilnamalary barada habar berdiler. Bu barada Reuters agentligi ýazýar.
Geçen ýyl kompaniýalar 7,23 mln awtoulag satdy, bu bolsa bir ýyl ozalkydan 1% azdyr. Bu Ýewropada we Günorta Koreýada islegiň peselmeginiň netijesi boldy.
Häzirki wagtda awtoöndürijileriň aglabasy bazarda birnäçe kynçylyklar, şol sanda Günorta Koreýada syýasy durnuksyzlyk we ABŞ-da awtomobilleriň importy üçin täze nyrhlary girizmek mümkinçiligi bilen ýüzbe-ýüz bolýar. Bu wakalaryň bolýan döwründe Hyundai Jorjiýa ştatyndaky täze zawodynda önümçiligi işe girizdi we bu kompaniýa elektrokarlar üçin salgyt ýeňillikleriniň talaplaryna laýyk gelmäge mümkinçilik berer.
Hyundai we Kia täze modelleriň kömegi bilen ABŞ-da öz orunlaryny berkitmek isleýär. Honda we Nissan ýaly ýapon brendleri bilen bäsdeşligiň güýçlenýän şertlerinde koreý ägirtleriniň üstünligi olaryň global bazarda üýtgeýän şertlere uýgunlaşyp bilmegine baglydyr.
Belläp geçsek, häzir kompaniýalaryň ýagdaýy erbet däl. Mysal üçin, umumy satuwyň azalandygyna garamazdan, Kia-nyň amerikan bölümçesi 2024-nji ýyly rekord görkezijiler – 796 488 awtomobil bilen tamamlady. Bu kompaniýanyň taryhynda iň gowy netijedir. Satuw liderleriniň arasynda 161 917 nusga bilen satylan Kia Sportage krossoweri we 1 869% satuw ösüşi bilen doly elektrik EV9 bar.
Kia elektromobilleriniň satuwy geçen ýyl bilen deňeşdirilende 74% ýokarlandy.
Beýleki modeller hem ýokary netijeleri görkezýär: 2024-nji ýylda Kia Forte (+13%) we Telluride (+4%) awtomobilleriniň satuwy ýokarlandy.
