“Altyn globus – 2025” baýragynyň ýeňijileri yglan edildi

06.01.2025 14:51
2.3k+

ABŞ-nyň Kaliforniýa ştatynyň Bewerli-Hillz şäherinde “Altyn globus” baýragynyň 82-nji gowşurylyş dabarasy geçirildi.

Şu ýyl iň köp baýrak alan “Emiliýa Peres” mýuzikli boldy. Film 8 nominasiýada hödürlendi we dördüsinde ýeňiji boldy: iň gowy mýuzikl, iň gowy daşary ýurt filmi, ikinji plandaky iň gowy zenan keşbi (Zoi Saldana) we iň gowy aýdym.
Dramatik filmleriň arasynda iň möhüm baýraklary “Brutalist” filmi gazandy. Ol üç heýkele mynasyp boldy: iň gowy drama, iň gowy aktýor (Edrien Broudi) we iň gowy režissýor (Bredi Korbet).
Seriallaryň arasynda esasy baýrak eýesi “Sýogun” boldy. Ýapon taryhy dramasy öz kategoriýasynda iň gowusy diýlip atlandyryldy, öz rollary üçin baýraklary Hiroýuki Sanada, Anna Sawai we Tadanobu Asano hem aldy. Mini-serialda öz rollary üçin heýkellere Kolin Farrell (“Pingwin”) we Jodi Foster (“Hakyky detektiw: Gijäniň mekany”) mynasyp boldular.

Esasy nominasiýalarda laureatlar:

·Iň gowy film – drama: “Brutalist” (Бруталист, A24)
·Iň gowy film – mýuzikl ýa-da komediýa: “Emiliýa Peres” (Эмилия Перес, Netflix)
·Iň gowy animasion film: “Akym” (Поток, Sideshow / Janus Films)
·Kinematografiýada we prokatda gazanylan üstünlikler: “Zalym” (Злая, Universal Pictures)
·Daşary ýurt dilinde iň gowy film: “Emiliýa Peres” (Netflix) – Fransiýa
·Dramada iň gowy zenan keşbi: Fernanda Torres (“Men henizem bärde”, Я всё ещё здесь)
·Dramada iň gowy erkek keşbi: Edrien Broudi (“Brutalist”)
·Mýuziklde ýa-da komediýada iň gowy zenan keşbi: Demi Mur (“Substansiýa”, Субстанция)
·Mýuziklde ýa-da komediýada iň gowy erkek keşbi: Sebastian Sten (“Başga adam”, Другой человек)
·Islendik filmde ikinji plandaky iň gowy zenan keşbi: Zoi Saldana (“Emiliýa Peres”)
·Islendik filmde ikinji plandaky iň gowy erkek keşbi: Kiran Kalkin (“Hakyky agyry”, Настоящая боль)
·Iň gowy režissýor – film: Bredi Korbet (“Brutalist”)
·Iň gowy ssenariý – film: Piter Strohan (“Konklaw”, Конклав)
·Iň gowy drama teleserialy: “Sýogun” (Сёгун, FX/Hulu)
·Iň gowy teleserial – mýuzikl ýa-da komediýa: “Hileler” (Хитрости, HBO/Max)
·Iň gowy mini-serial, serial-antologiýa ýa-da telefilm: “Sugun çagasy” (Оленёнок, Netflix)