NASA-nyň Reaktiw hereket barlaghanasynda (Jet Propulsion Laboratory, JPL) Gyzyl planetanyň barmasy kyn ýerlerini öwrenip, mümkinçilikleri babatda ozalky görnüşlerinden ep-esli öňe geçjek mars dikuçarynyň taslamasynyň üstünde işlenip başlandy diýip, Extremetech habar berýär.
Mars Chopper atly dikuçaryň taslamasy barada JPL-iň wekili Teddi Sanetos Amerikan Geofiziki Bileleşiginiň (AGU) dekabr aýynda geçen mejlisinde çykyş etdi. Onuň sözlerine görä, täze apparat Ingenuity-niň üstünliginden soň, Marsyň barlag işlerinde nobatdaky basgançak bolar.
NASA eýýäm täze dikuçaryň nähili boljakdygyny görkezýän wideony çap etdi.
2021-nji ýylda Marsa Perseverance roweri bilen bilelikde iberilen Ingenuity dikuçarynyň tamany artygy bilen ödändigini ýatladýarys. Agramy 1,8 kg bolan dikuçar meýilleşdirilen bäş uçuşyň ýerine 72 uçuş etdi. Onuň garaşylmadyk üstünligi barmasy kyn ýerlerden geçmäge we mars rowerleriniň baryp bilmeýän ýerlerini öwrenmäge ukyply howa apparatlarynyň täze neslini işläp düzmäge itergi boldy.
Mars Chopper has uly we has kuwwatly bolar. Onuň agramy çen bilen 40 kg-a çenli bolup, 5 kg-a çenli ylmy enjamlary daşamaga mümkinçiligi bolar. Dikuçar günde 3 km aralygy geçip biler we bu Marsy öwrenmekde iň ykjam gural bolar. Işläp düzüjileriň sözlerine görä, şular ýaly apparatlar ylym, şol sanda jaýryklarda we beýleki barmasy kyn ýerlerde organiki ýaşaýyş üçin gizlenip boljak ýerleri öwrenmekde täze gözýetimleri açar.
