Microsoft-yň aksessuarlaryny öndürmek bilen meşgullanýan Incase kompaniýasy bahasy 120 dollarlyk ykjam, ergonomiki klawiaturany bildiriş etdi. Täze klawiatura ýumşak bilekgoýar we AI Copilot-a çalt girmek üçin ýörite düwme bilen enjamlaşdyrylandyr diýip, The Verge habar berýär.
Klawiaturada amatly we ýeňil ýazmaga mümkinçilik berýän gaýçy mehanizmli (Scissors System) we 1,3 mm hereketli ultra duýgur düwmeler ulanylýar. Oňa Bluetooth arkaly üç enjamy birikdirip bolýar we ömri üç ýyla ýetjek iki sany AAA batareýasynda işleýär.
Klawiatura 2023-nji ýylda Microsoft bilen Incase-yň arasynda baglaşylan hyzmatdaşlyk şertnamasynyň çäklerinde döredildi. Surface hataryna degişli däl aksessuarlaryny çykarmagy bes edensoň, Microsoft şol önümleriň önümçiligini şol bir bölekleri we üpjünçilik zynjyryny saklap, Incase kompaniýasyna geçirdi.
Bahasynyň meşhur Logitech Ergo K860-yň (130 $) bahasyna ýakyndygyna garamazdan, Incase klawiaturasynyň bahasy 365 $ (meselem, Nuio Flow ýa-da ZSA Voyager ýaly) bolan premium klawiaturalardan has amatly bolup galýar.
Klawiaturanyň 2025-nji ýylyň başynda satuwa çykarylmagyna garaşylýar. Mundan başga-da, Incase Microsoft-yň işläp taýýarlanlaryna esaslanýan beýleki esbaplary hem hödürlemegi meýilleşdirýär.
