“Kalmar oýny” serialynyň ikinji möwsüminiň premýerasyndan bir hepde soň Netflix üçünji möwsümiň ilkinji tizerini hödürledi. Täze möwsüm wakanyň finaly bolar diýip, akym hyzmaty tassyklady.
Üçünji möwsümiň premýerasy 2025-nji ýyla meýilleşdirilýär, ýöne takyk sene heniz yglan edilmedi. Serialy dörediji Hwan Don Hek serialyň dowamynyň, ähtimal, tomusda ýa-da güýzde çykjakdygyny aýtdy.
“Kalmar oýnunyň” ikinji möwsümi tankytçylarda dürli seslenme döretdi. Käbirleri üçin ol, mifologiýanyň düýpli ösüşi bolmazdan, süýndürilen we birinji möwsüme meňzeş ýaly göründi. Ýöne taslama synp deňsizligi we kapitalistik ulgamyň meseleleri ýaly temalara üns berýändigi üçin öwgi almagyny dowam etdirýär.
Tankytlara garamazdan, şouwyň täze möwsümi derrew hite öwrülip, Netflix-iň elýeterli bolan ähli ýurtlarynda öňdebaryjy orny eýeledi. Taslama çykandan soň dört günde 68 mln tomaşa ýygnap, platformanyň serial taryhynda iň gowy başlangyjy görkezdi.
