Hytaýyň Mingyang Smart Energy kompaniýasy arassa wodorodda işleýän dünýäde iň kuwwatly elektrogeneratory döretdi. Ol gaýtadan dikeldilýän çeşmeler tarapyndan energiýa önümçiligindäki bökdençlikleri aradan aýyrmaga ukyply diýip, New Atlas habar berýär.
Jupiter One elektrogeneratorynyň kuwwaty 30 MWt bolup, bu sagatda 443,45 tonna wodorodyň ýakylmagy arkaly gazanylýar.
Täze tehnologiýa Gün we ýel tarapyndan önümçiligiň iň ýokary derejesinde döreýän artykmaç energiýany netijeli ulanmaga mümkinçilik berýär. Elektrik energiýasynyň ýitgi meselesi Hytaý üçin aýratyn möhümdir. Gaýtadan dikeldilýän çeşmelerden alynýan energiýanyň, takmynan, 25%-i ýurduň demirgazyk-günbataryndan gündogaryna energiýany eltmek üçin elektrik geçiriji liniýalaryň ýetmezçiligi sebäpli ýitýär. Jupiter One suw elektrolizi arkaly artykmaç elektrik energiýasyny wodoroda öwürmäge, soňra ony energiýa öndürmek üçin ulanmaga mümkinçilik berip, bufer halkasy hökmünde hereket edip biler.
Generator ýokary derejede sazlaşykly işleýän on sany ýanyş kamerasyna eýedir. Wodorod ýangyç hökmünde ýokary reaktiwligi sebäpli ýanmak prosesine berk gözegçiligi talap edýär.
Işläp düzüjiler bu tehnologiýa gaýtadan dikeldilýän energiýa çeşmeleriniň yzygiderli işlemezlik meselesini çözmäge kömek edip, ýaşyl energetikany has durnukly eder diýip hasaplaýarlar.
