Meta kompaniýasy Instagram-da we Facebook-da wirtual gahrymanlary döretmek üçin emeli aňdan işjeň peýdalanmagy meýilleşdirýär. Olaryň öz terjimehallary, profil suratlary bolar we mazmuny çap edip bilerler diýip, Financial Times ýazýar.
Kompaniýa eýýäm 3 milliard ulanyjysy bolan auditoriýany özüne çekmek we saklamak üçin şeýle usula ýüzlenmegi karar etdi.
Kompaniýanyň generatiw AI boýunça wise-prezidenti Konnor Heýs bu çäreleriň ýakyn iki ýylda Meta programmalarynyň özüne çekijiligini ýokarlandyrmaga gönükdirilendigini aýtdy. Ol kompaniýanyň ozal birnäçe ýüz müň wirtual gahryman döredilen guraly işe girizendigini ýatlatdy.
Hünärmenler nädogry maglumatlaryň ýaýramagy we mazmunyň hiliniň peselmegi bilen baglanyşykly töwekgelçilikler barada duýduryş berýärler. Bu howplara garşy göreşmek üçin Meta öndürilen materiallara bellik etmegi meýilleşdirýär.
Kompaniýa AI tehnologiýalaryny işjeň durmuşa ornaşdyrmagy dowam etdirýär. Ondan öň blogerleriň ýerine abonentleriň soraglaryna jogap berýän AI kömekçilerini işe girizipdi, indiki ýyl bolsa ulanyjylar tekst haýyşy boýunça öz gatnaşmagynda wideo döredip bilerler.
