Italiýanyň “Milan” futbol kluby Paulu Fonsekanyň baş tälimçi wezipesinden gidendigini resmi taýdan habar berdi. Portugaliýaly hünärmen topara 2024-nji ýylyň tomsunda ýolbaşçy bolupdy.
“Paulu Fonseka erkekleriň birinji toparynyň baş tälimçisi wezipesinden boşadyldy. Klub Paulu ýokary hünär ussatlygy üçin minnetdarlyk bildirýär we oňa geljekki işinde ähli gowulyklary arzuw edýär” – diýip, klubuň metbugat gullugynyň resmi saýtdaky beýanynda aýdylýar.
KHBS-iň maglumatlaryna görä, “Milanyň” täze baş tälimçisi başga bir portugaliýaly – Seržiu Konseýsau bolar. 2001-2003-nji ýyllarda ol oýunçy hökmünde “Milanyň” esasy garşydaşy bolan “Interde” çykyş edipdi.
Häzirki wagtda “Milan” 17 oýundan soň 27 utuk bilen Seriýa A-nyň ýaryş jedwelinde sekizinji orny eýeleýär. Italiýanyň çempionatynyň indiki tapgyrynda topar “Kalýari” bilen oýnar.
