29-njy dekabrda Günde 15 sany kuwwatly partlama, şol sanda bir iň ýokary X derejeli partlama hasaba alyndy. Bu barada Amaly geofizika institutyna salgylanyp, TASS habar berýär.
Astronomlaryň maglumatlaryna görä, X derejeli partlama Ýere täsirini ýetirip biljek sebitde bolup geçdi.
“Deslapky maglumatlara görä, orta magnit tupanlary bilen massa zyňyndylarynyň 31-nji dekabrdan 1-nji ýanwara geçilýän gije Ýere ýetmegi mümkin” – diýlip, habarda aýdylýar.
Birinji M1.2 derejeli partlama ýekşenbe gününe geçilen gije, Aşgabat wagty bilen 03:14-de 3933 (S09W61) tegmiller toparynda hasaba alyndy. Onuň dowamlylygy 19 minut boldy.
Günüň dowamynda M we X derejeli ýene 14 partlama bolup geçdi. Kosmos howasyna gözegçiligiň maglumatlaryna görä, iň güýçlüleri Aşgabat wagty bilen 12:18-de hasaba alnan X1.1 we 20:09-da hasaba alnan M7.1 boldy.
Gün partlamalary rentgen şöhlelenmesiniň güýji boýunça bäş kategoriýa bölünýär: A, B, C, M we X. Iň pes A0.0 derejesi Ýeriň orbitasynda bir inedördül metr üçin 10 nWt şöhlelenme güýjüne laýyk gelýär. Derejäniň ýokarlanmagy bilen kuwwatlylyk hem 10 esse artýar. Partlamalar, köplenç, Ýere ýetende magnit tupanlaryna sebäp bolup bilýän Gün plazmasynyň zyňyndylary bilen utgaşýar.
