Germaniýanyň Prezidenti Frank-Walter Ştaýnmaýer bundestagy dargadyp, 2025-nji ýylyň 23-nji fewralyna möhletinden öň parlament saýlawlaryny belledi. Bu barada Tagesschau habar berýär.
Ol şeýle çözgüdi 16-njy dekabrda parlament deputatlary kansler Olaf Şolsuň hökümetine ynamsyzlyk bildirenden soň kabul etdi.
Şolsuň özi tarapyndan öňe sürlen mejlisde onuň kabinetini 717 deputatdan diňe 207-si goldady, 394-üsi garşy çykdy, 116-sy saklandy. Bu 2021-nji ýyldan bäri Sosial-demokratik partiýany, “Ýaşyllary” we Azat demokratik partiýany öz içine alýan dolandyryjy koalisiýanyň dargamagyndan soň bolup geçdi. Soňkusy ykdysady özgertmeler baradaky düşünişmezlikleriň esasynda noýabr aýynda koalisiýany terk etdi, bu hem hökümeti parlament köplüginden mahrum etdi.
“Häzirki ýaly çylşyrymly döwürde durnuklylygy üpjün etmek üçin işe ukyply hökümet we parlamentde ygtybarly köplük talap edilýär” – diýip, Ştaýnmaýer aýtdy, onuň sözlerini Deutsche Welle agentligi getirýär.
GFR-iň Prezidenti durnukly köplügi döretmek synanyşygynyň netijesiz bolandygyny belledi.
Prezidentiň çözgüdi ýurduň syýasy ýagdaýyny aýdyňlaşdyrjak möhletinden irki saýlawlara resmi taýýarlyk prosedurasyny tamamlaýar.
