Kristofer Nolan gadymy grek poemasy bolan Gomeriň “Odisseýiniň” kino görnüşini düşürýär. Universal Pictures geljekki filmiň premýerasynyň meýilleşdirilen senesini yglan etdi – 2026-njy ýylyň 17-nji iýuly.
Nolanyň taslamasy döwrebap IMAX kameralaryny ulanyp, “dünýäniň dürli künjeklerinde surata düşürilen mifiki ekşn-epos” hökmünde häsiýetlendirilýär.
Filmiň aktýorlar düzümine Mett Deýmon, Robert Pattinson, Tom Holland, Zendaýa, Şarliz Teron we Lupita Niongo goşuldy. Ilkinji dördüsi baş rollary ýerine ýetirer. Film 2025-nji ýylyň başynda surata düşürilip başlanar.
Nolanyň geçenki filmi “Oppengeýmer” režissýora diňe bir ilkinji “Oskary” getirmän, eýsem bütin dünýäde 975 mln dollar gazanyp, girdejili filme öwrüldi. Onuň beýleki blokbasterleriniň arasynda “Gara rysar” (Темный рыцарь) trilogiýasy, “Başlangyç” (Начало), “Insterstellar” (Интерстеллар) we “Dýunkerk” (Дюнкерк) bar.
Gadymy grek şahyry Gomeriň “Odisseýi” antiki edebiýatyň iň gadymy we belli eserleriniň biridir. Poema mifiki Itaka şasy Odisseý we onuň Troýa urşundan soň watanyna tarap ýolda köpýyllyk başdangeçirmeleri barada gürrüň berýär.
