Hytaýyň Agibot startapy umumy maksatly adam şekilli robotlaryň tapgyrlaýyn önümçiliginiň başlanandygyny habar berdi. Bu 2023-nji ýylyň fewral aýynda döredilen kompaniýany robototehnika bazarynda öňdebaryjylaryň birine öwürýär. Global Times-yň maglumatlaryna görä, ýylyň ahyryna çenli şeýle gurluşlardan 1000-e golaýyny çykarmak meýilleşdirilýär.
Hytaýda startap Zhiyuan Robotics ady bilen işleýär. Onuň önümçilik kuwwaty Şanhaýdaky Lingang Fengxian zawodynda ýerleşýär we bu ýerde eýýäm 962 robot ýygnaldy. Görkeziş wideosynda Agibot ýygnama tapgyrlaryny görkezip, hatarlarda eýýäm hususy gumanoid robotlaryň ulanylýandygyny belledi. Olar işgärlere gurallary ýerleşdirmäge we komponentleri synagdan geçirmäge kömek edýär.
Agibot funksionallygy ýokarlandyrmak üçin “maglumat ýygnamak fabrikasyny” gurnady. Onda robotlara arassalamak işleri we kir ýuwmak ýaly hojalyk işleri öwredilýär.
Analitikler Agibot-yň üstünligi Hytaýda robototehnika pudagynyň okgunly ösýändigini görkezýär diýip hasaplaýar. Şeýle-de bolsa, ABŞ-daky kompaniýalar, şol sanda Tesla çip we operasion ulgamlary işläp taýýarlamakda güýçli orunlary saklaýar. Iýul aýynda Tesla-nyň ýolbaşçysy Ilon Mask hakykatdan peýdaly gumanoid robotlaryň geljek ýyl Tesla tarapyndan kompaniýanyň içinde ulanylyp başlanjakdygyny, olaryň köpçülikleýin önümçiliginiň bolsa 2026-njy ýyla meýilleşdirilýändigini aýtdy.
Tapgyrlaýyn önümçiligiň başlanandygyna garamazdan, Agibot häzirlikçe amerikan kompaniýalary bilen diňe käbir tehnologik ugurlarda: hereketi dolandyrmakda we ösen EA modellerini döretmekde, şeýle-de robotlary ulanmagyň dürli ýagdaýlaryny öwenmekde bäsleşýär. Ýöne Tesla we Nvidia ýaly amerikan kompaniýalary elleri takyk dolandyrmak we operasion mümkinçilikler, şeýle-de ýokary öndürijilikli çip önümçiligi we bulut hasaplaýyş çeşmeleri ýaly ugurlarda beýlekilerden uly artykmaçlyga eýedir.
