Telegram messenjeri 11.5.2 wersiýasyna çenli täzelenenden soň, iPhone ulanyjylary gurluşyň akkumulýatorynyň çalt zarýadsyzlanmagy we aşa gyzmagy bilen ýüzbe-ýüz bolup başladylar diýip, 3DNews habar berýär.
Geçen dynç günleri App Store-da iOS 18-de işleýän dürli iPhone modelleriniň eýelerinden onlarça nägilelik bildirýän synlar peýda boldy.
Ulanyjylaryň aýtmagyna görä, messenjer, aýratynam, wideo göreniňde gurluşyň ýokary derejede gyzmagyna getirýär. Şeýle-de, Telegram-yň fon režiminde işjeň işleýändigi we munuň hem akkumulýatoryň zarýadsyzlanmagyny goşmaça güýçlendirýändigi bellenilýär.
Synlardan telefonyň aşa temperatura çenli gyzýandygyny, batareýanyň zarýadynyň bolsa bary-ýogy 20 minutda 12% azalýandygyny görmek bolýar. Mesele diňe programma doly ýapylandan soň aýrylýar.
Häzirki wagtda bu meseläniň wagtlaýyn çözgüdi Telegram-y köp funksionally menýuda ýapmakdyr. Işläp düzüjiler entek bu ýagdaýa teswir bermediler, ýöne tiz wagtdan näsazlyklary düzetmek üçin täzelenme çykarsalar gerek.
