Prezident Serdar Berdimuhamedow Germaniýa Federatiw Respublikasynyň Prezidenti Frank-Walter Ştaýnmaýere ýurduň Magdeburg şäheriniň Täze ýyl bazarynda bolup geçen, adam pidalaryna we şikes ýetmelere getiren pajygaly waka zerarly gynanç hatyny iberdi. Gynanç haty resmi metbugatda çap edildi.
Döwlet Baştutany şu agyr pursatda gurban bolanlaryň dogan-garyndaşlaryna hem-de ýakynlaryna Türkmenistanyň halkynyň we Hökümetiniň adyndan, şeýle-de hut öz adyndan ýürekden gynanjyny we medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
20-nji dekabrda Magdeburg şäheriniň (Saksoniýa-Anhalt) Täze ýyl bazarynda awtoulag sürüjisi adamlaryň köpçüligine basgy etdi. Reuters agentliginiň habar bermegine görä, 5 adam aradan çykdy, 200-den gowrak adam dürli derejedäki şikesleri aldy.
