“Formula-1-iň” dört gezek çempiony Maks Werstappen abraýly Autosport britan neşiriniň wersiýasyna görä 2024-nji ýylyň iň gowy sürüjileriniň sanawynda birinji ýeri eýeledi. Red Bull-yň sürüjisi üçin bu titul karýerasyndaky dördünji titul boldy. Şol bir wagtyň özünde, niderlandly sürüji 18-nji dekabrda GT seriýaly awtoulaglaryň Portimaodaky trassada geçirilen synaglarynda öz derejesini tassyklady.
Werstappen DTM çempionatynda bäsleşýän Emil Freý Racing toparynyň Ferrari 296 GT3 ýaly, üç dürli awtoulagda ilkinji iň gowy üç netijäni gazandy.
Bu niderlandly sürüjiniň Ferrari awtoulaglaryny sürmekde ilkinji tejribesi däl. Ondan öň Mujello trassasynda italýan markasynyň ulaglaryny synagdan geçiripdi.
“Formula-1”-iň 2024-nji ýyldaky möwsüminde Maks iň ýakyn bäsdeşi Lando Norrisden 63 utuk öňe saýlanyp, çempionlygy gazandy. Şeýle-de bolsa, onuň Red Bull topary kubogy "MacLaren-e" geçirip, Konstruktorlaryň kubogy hasabynda bary-ýogy üçünji orny eýeledi. Ikinji ýeri Ferrari topary eýeledi.
Autosport-yň iň oňat sürüjileriniň reýtinginde Ferrariniň sürüjisi Şarl Lekler ikinji, möwsümiň wise-çempiony Lando Norris (MacLaren) bolsa üçünji ýeri eýeledi.
Ilkinji onluga IndyCar-yň çempiony Aleks Palou we “Formula E”-niň ýeňijisi Paskal Werlýaýn ýaly, beýleki ýaryş seriýalarynyň wekilleri hem girdi. Ilkinji onlugy ralli boýunça dünýä çempiony (WRC) Týerri Nýowil tamamlady.
