2024-nji ýylyň 19-20-nji dekabrynda “Arçabil” myhmanhanasynda BMG-niň Azyk we oba hojalyk guramasy (FAO) tarapyndan suw jandarlary üçin iýmleriň önümçiligini, olaryň hilini we durnuklylygyny ýokarlandyrmaga gönükdirilen milli okuw seminary geçirildi.
Çäre FAO-nyň “Akwa önümçiligi üçin iýmitleriň önümçilik-ýerlemek zynjyrynyň we suw haýwanlarynyň saglygyny goramagy dolandyrmagyň netijeliliginiň ösüşi” TCP/TUK/3902 taslamasynyň çäklerinde geçirildi.
Seminara döwlet edaralarynyň, Senagatçylar we telekeçiler birleşmesiniň wekilleri, şeýle-de milli balyk iýmlerini öndürijiler gatnaşdy. Okuwy FAO-nyň halkara hünärmeni Tomas Şipton geçirdi.
Çäräniň esasy mowzuklary suw jandarlary üçin iýmleriň taýýarlanyş usulyny işläp taýýarlamak, olaryň önümçiligi we fermalarda dolandyrmak boldy.
Türkmenistanyň Oba hojalyk ministrliginiň ýanyndaky Döwlet weterinariýa gullugynyň halkara bölüminiň başlygy Arslan Soltanmyradow öz çykyşynda balyk ösdürip ýetişdirýän fermalaryň öndürijiligini we önümçiligiň ekologiýa taýdan durnuklylygyny ýokarlandyrmak üçin döwrebap tehnologiýalary ornaşdyrmagyň möhümdigini belledi.
Bu seminar öndürijileriň, balykçylaryň we pudak edaralarynyň kwalifikasiýasyny ýokarlandyrmaga, şeýle-de ýerli öndürilen akwa iýmleriň hilini ýokarlandyrmaga gönükdirilendir. Ýene bir maksat – iýmleri netijeli dolandyrmagy we ykdysady taýdan esasly taýýarlanyş usullaryny düzmegi öwretmek.
