Uky boýunça amerikaly hünärmen, psiholog Ketrin Holl sowuk çyranyň (gök) ýa-da bezeg çyralarynyň (girlýanda) ýylpyldysynyň gijeki dynç alşyň hiline näme üçin ýaramaz täsir edip biljekdigini düşündirdi. Bu barada New York Post neşiri ýazýar.
Gürrüň gök çyranyň we güýçli ýylpyldynyň melatoniniň – sirkad ritmlerini kadalaşdyrmaga jogap berýän gormonyň işlenip çykarylmagyny togtadyp bilmegindedir.
Hünärmeniň aýtmagyna görä, aýratynam, bezeg çyralarynyň we elektron gurluşlaryň ýaýradýan gök yşygy zyýanlydyr. Ol gysga tolkun uzynlygyna hem-de ýokary energiýa eýe we bu hüşgärligi ýokarlandyrýar. Gündiz şeýle yşyk peýdaly, ýöne gijesine ol organizme uka taýynlyk görmäge päsgel berýär.
Ýaramaz täsiri azaltmak üçin, Holl bezeg çyralaryny ýatmazdan iki-üç sagat öň öçürmegi maslahat berýär. Şeýle-de, ol ýumşak yşyklary – sary öwüşginli gyzyl ýa-da ak çyralary saýlamagy maslahat berýär. Olar melatoniniň işlenip çykarylmagynda päsgelçilik döretmän, tersine, rahatlanmaga kömek edýär.
Şeýle-de, hünärmen ýylpyldaýan çyralardan gaça durmagy maslahat berýär. Ýanyp öçýän yşyklar görüş gyjyndyrmasyna getirip, uklamagy kynlaşdyrýar.
